Divisional Secretariat - valikamam north

Details

Last Updated: 07 October 2026

மாற்றுத்திறனாளிகளின் வேலைவாய்ப்பு பங்களிப்பை மேம்படுத்தும் நோக்கில் சமூக சேவைகள் திணைக்களத்தினால் முன்னெடுக்கப்படும் சிஹினா இலங்கை (SHINA Sri Lanka) வேலைவாய்ப்பு ஆதரவு திட்டம், மனிதவள மற்றும் வேலைவாய்ப்பு திணைக்களத்தின் ஒத்துழைப்புடன், வேலைவாய்ப்பு ஆதரவு அலகு (Employment Support Unit) ஊடாக நாடு முழுவதும் நடைமுறைப்படுத்தப்பட்டு வருகிறது.

இத்திட்டத்தின் ஒரு பகுதியாக, மாவட்டத்தில் நடைபெற்ற  நிகழ்ச்சி, 2026  செப்டெம்பர், மாதம் 02 ம் திகதி பருத்தித்துறை  நாகர் கோவில்  முன்றலில் அழகிய  இயற்கையான இடத்தில்  இடம்பெற்றது. வலிகாமம் வடக்கு,தெல்லிப்பழை  பிரதேச செயலகப் பிரிவில், சமூக சேவைகள் திணைக்களத்தின்   சமூக சேவை உத்தியோகத்தர் அவர்களின் தலைமையில் வெற்றிகரமாக நடைபெற்றது.

இந்நிகழ்ச்சியின் பிரதான நோக்கம், மாற்றுத்திறனாளிகளை வேலைவாய்ப்பு வழங்குநர்களுடன் இணைத்து, அவர்களின் பொருளாதார சுயநிறைவை மேம்படுத்துதல், உடல் மற்றும் மனநல நலன்களை வலுப்படுத்துதல், மேலும் அனைவரையும் உள்ளடக்கிய ஆரோக்கியமான பணிச்சூழலை உருவாக்குவதாகும்.

நிகழ்வில்   மாற்றுத்திறனாளிகள் பல்வேறு திறமைகளையும் ஆற்றல்களையும் கொண்டவர்கள் என்றும், அவற்றை வெளிப்படுத்தி பொருத்தமான வேலைவாய்ப்புகளைப் பெறுவதற்கான சிறந்த வாய்ப்பாக இத்திட்டம் அமைகிறது என்றும்  மனிதவள மேம்பாட்டு அலுவலர், எதிர்கால வேலைவாய்ப்புகளைப் பெறுவதற்குத் தேவையான தகுதிகள், முன்னேற்பாடுகள் மற்றும் விண்ணப்ப நடைமுறைகள் தொடர்பாக பயனுள்ள வழிகாட்டல்களையும் தனது தொழில்முறை அனுபவங்களையும் பங்கேற்பாளர்களுடன் பகிர்ந்து கொண்டார்.நிகழ்வின்போது, பணியிடங்களில் மாற்றுத்திறனாளிகள் எதிர்கொள்ளும் சவால்கள், அவற்றை வெற்றிகரமாக எதிர்கொள்வதற்காக அவர்கள் பயன்படுத்திய உத்திகள் மற்றும் மாற்றுத்திறனாளிகளுக்கு வேலைவாய்ப்புகளை வழங்கும்போது தொழில் வழங்குநர்கள் எதிர்நோக்கும் சிரமங்கள் தொடர்பில் பயனுள்ள கலந்துரையாடல்கள் இடம்பெற்றன.

மேலும், பங்கேற்பாளர்களின் தன்னம்பிக்கை, குழு உணர்வு மற்றும் தனிப்பட்ட நலனை மேம்படுத்தும் வகையில் பல்வேறுபட்ட ஆளுமை விருத்தி ,ஊக்கமளிப்பு போன்ற விளையாட்டுக்கள் மற்றும் செயற்பாடுகளும் நடத்தப்பட்டன.

மாற்றுத்திறனாளிகளுக்கான வேலைவாய்ப்பு வாய்ப்புகளை ஊக்குவிப்பதிலும், அவர்கள் சமூகத்தில் சுறுசுறுப்பான முறையில் பங்கேற்பதற்கான  வாய்ப்புகளை ஏற்படுத்துவதிலும் இந்நிகழ்வு முக்கிய பங்காற்றியதுடன், பங்கேற்பாளர்களிடமிருந்து சாதகமான வரவேற்பையும் பெற்றுக்கொண்டது இந் நிகழ்வில்  சமூகபராமரிப்பு கிளை உத்தியோகத்தர்கள் மற்றும்  உளவளத்துணையாளர், மற்றும்  மனிதவள  மேம்பாட்டு உத்தியோகத்தர்கள், மாற்றுதிறனாளிகள் 40 நபர்கள் பங்கு பற்றினர்.